გავრცელებული აზრის მიუხედავად, შეწვამდე ქათმის შეკვრა აუცილებელი არ არის. ამითი ხორცის გემო დიდად არ იცვლება. მაგრამ თუ თქვენ გნებავთ, რომ ფეხები, ფრთები და კისერი თავის ადგილზე დარჩეს და თანაბრად შეიწვას, ასევე სუფრაზე კერძი ლამაზად გამოიყურებოდეს, მაშინ ისწავლეთ მისი შეკვრა. ამისთვის დაგჭირდებათ სქელი ძაფი, თასმა ან ბაწარი.

თასმით შეკვრა

1. მოათავსეთ ქათამი მკერდით მაღლა,  თასმით შეუკარით ფეხები და კურტუმო.
2. გაატარეთ თასმა ბარკლებსა და ტანს შორის კისრისკენ და ამოატრიალეთ ქათამი.
3. გადააჯვარედინეთ თასმა ზურგის შუაში.
4. შემოაკარით  ფრთებს თასმა, რომ  ტანს კარგად მიეკრას.
5. მოქაჩეთ თასმა  და შეკარით.

ნემსით  და ძაფით შეკვრა

დიდი ქათმის შესაკრავად დაგჭირდებათ მსხვილი ნემსი ფართო ყუნწით და ასევე მსხვილი ძაფი. მთავარია, კვანძი შეკრათ კურტუმოსთან, რომ ფეხები დააფიქსიროთ. ფრთებს კი შემდგომ ცალკე შეუკრავთ.

1. გაუყარეთ ნემსი კურტუმოში ხერხემლისკენ.
2. გაუყარეთ ნემსი ერთი ფეხის სახსართან.
3. გაუყარეთ ნემსი მკერდის ძვლის ბოლოში და შემდეგ მეორე ფეხის სახსართან.
4. მოქაჩეთ ძაფი და გაკვანძეთ.